Framboðsfrestur til 3. febrúar.
Vinstri græn í Reykjavík auglýsa eftir framboðum áhugasamra sem vilja taka sæti á framboðslista VG í Reykjavík. Jafnframt er óskað eftir tillögum um fólk á framboðslista. Frestur til að skila inn framboðum og tillögum rennur út 3. febrúar, svo um tvær vikur eru til stefnu til að skella sér í slaginn. Kosið verður rafrænt 24. febrúar og er það í fyrsta sinn sem rafrænt forval fer fram fyrir kosningar innan Vinstri hreyfingarinnar græns framboðs. (en staðbundin kosninga í kassa verður líka í boði) Kosið verður í fimm efstu sætin. Kynning á frambjóðendum fer fram á opnum fundi VG í Reykjavík, laugardaginn 10. febrúar. Steinar Harðarson, formaður VG í Reykjavík, ritaði eftirfarandi bréf sem sent var út á póstlista Reykjavíkurfélagsins.
Kæri félagi,
Nú hefjum við undirbúning borgarstjórnarkosninga í Reykjavík sem fara munu fram þann 26. maí nk. Félagsfundur Vinstri grænna í Reykjavík ákvað fimmtudaginn 18. janúar s.l. að fela fimm manna kjörnefnd að sjá um forval þar sem valið yrði í 5 efstu sæti framboðslista Vinstri grænna og gera tillögu til félagsfundar að uppstillingu í önnur sæti listans.
Forvalið verður framkvæmt með rafrænni kosningu og fer fram 24. febrúar. Þau sem ekki sjá sér fært að kjósa rafrænt munu þó geta kosið með hefðbundnum hætti. Nánari upplýsingar um fyrirkomulag og framkvæmd forvalsins verða auglýstar þegar framboðsfresti lýkur. Tillaga kjörnefndar verður lögð fyrir félagsfund til afgreiðslu í mars.
Í samræmi við reglur hreyfingarinnar um forval auglýsir kjörnefnd hér með eftir þeim sem áhuga hafa á að taka sæti á lista og kallar jafnframt eftir uppástungum um fólk á framboðslista. Tekið er á móti framboðum frá áhugasömum félögum og uppástungum um frambjóðendur í netfanginu: hugmyndir@vgr.is en einnig er hægt að senda bréf til kjörnefndar VGR 2018, Hallveigarstöðum, Túngötu 14, 101 Reykjavík. Frestur til að skila inn framboðum og uppástundum er til 3. febrúar nk.
Frambjóðendur þurfa að gera grein fyrir sér, t.d. með heimilisfangi, starfsheiti, netfangi eða símanúmeri. Það sama gildir um þá sem stungið er upp á. Hver félagi getur stungið upp á eins mörgum nöfnum og vilji er til og sent inn hugmyndir oftar en einu sinni fyrir tilskilinn tíma. Hvert nafn verður aðeins skráð einu sinni á blöð kjörstjórnar.
Stjórn félagsins vill einnig nota tækifærið til að minna félagsmenn á að greiða félagsgjöldin sem fyrst og bregðast vel við þegar hreyfingin kallar eftir sjálfboðaliðum og framlögum í kosningasjóð. Í aðdraganda kosninga er mikilvægt að fjárhagur félagsins sé sterkur og að við stöndum saman að því að vinna stefnumálum Vinstri grænna brautargengi. Margar hendur vinna létt verk og eru öll framlög vel þegin.
Einnig óskar stjórnin eftir upplýsingum um breytt heimilisfang, símanúmer og ekki síst netfang því réttar upplýsingar eru nauðsynlegar til að samskiptin milli stjórnar félagsins og félaga verði eins og best verður á kosið. Jafnframt eru þeir félagar sem ekki hafa skráð netfang sitt í félagaskrá VGR, en vilja fá tölvupóst frá félaginu, hvattir til þess að ská netfang sitt á heimasíðu hreyfingarinnar, www.vg.is. Það er sérstaklega mikilvægt á kosningaári að stjórn félagsins nái örugglega til sem flestra félaga.
Baráttukveðjur, X-V í vor!
Steinar Harðarson, formaður VGR