Endurreisum verkamannabústaðakerfið

Ástandið á húsnæðismarkaðnum í Reykjavík hefur sýnt okkur svart á hvítu að markaðslögmálin ráða einfaldlega ekki ein og óafskift við að leysa húsnæðisvandann. Allt of mikið er byggt af stórum og dýrum íbúðum sem tekjulágt fólk ræður ekki við að kaupa og henta ekki barnafjölskyldum.

Svipaða sögu er að segja af leigumarkaðuinum. Framkomu stórra fyrirferðarmikilla leigufélaga hefur verið lýst sem svívirðilegri. Leigjendur standa frammi fyrir tuga prósenta hækkun á leigu eða að lenda ella á götunni.

Þetta ástand er ekkert náttúrulögmál, heldur afleiðing þess að húsnæðismarkaðurinn þjónar ekki fólki, heldur fjármagni: Það er meiri arður af byggingu dýrra og stórra eigna, og fjárfestar sem hafa lagt fé í fasteignafélög krefjast hámarskávöxtunar. Græðgi, þ.e. ásókn í hámarksgróða er rót vandans.

Húsnæði fyrir fólk, ekki fjármagn

Við getum ekki beðið endalaust eftir því að markaðurinn leysi húsnæðisvandann. Reykjavíkurborg þarf að vera meiri gerandi í húsnæðismálum. En hún verður líka að vinna með öllum sem hafa áhuga á að leysa þennan vanda. Það sem okkur vantar er fjölbreyttari húsnæðismarkaður, þar sem fleiri form búsetu bjóðast. Umfram allt á borgin að taka höndum saman með verkalýðshreyfingunni um að endurreisa verkamannabústaðakerfið.

Verkalýðshreyfingin og stjórnvöld hafa áður tekið höndum saman um lausn húsnæðisvanda Reykvíkinga með verkamannabústöðum. Það gerðist fyrst á millistríðsárunum þegar Reykjavík bjó við svo alvarlegan húsnæðisskort að ástandið í borginni var eitt það versta í allri Evrópu. Á sjöunda áratugnum tók verkalýðshreyfingin svo þátt í því að byggja Breiðholtið og útrýma þannig braggahverfunum.

Í dag er þörf á samskonar átaki.

Leggjum grunn að langtímalausn

Samhent átak með verkalýðshreyfingunni og öðrum samtökum og félagasamtökum sem reka óhagnaðardrifin leigufélög er nauðsynlegt til að leysa húsnæðisvandans til skamms tíma. Til langs tíma er slík samvinninna þó enn mikilvægari.

Langtímalausn húsnæðisvanda borgarbúa krefst þess að við tryggjum að barnafjölskyldur og tekjulágt fólk sé ekki komið alfarið upp á kuldaleg lögmál markaðarins, heldur að hér sé starfandi kerfi sem býður fólki upp á fleiri valkosti.

Á næsta kjörtímabili viljum við í VG taka höndum saman með öllum þeim sem vilja byggja hér húsnæðiskerfi sem þjónar fólki, ekki fjármagni.

Höfundur er oddviti Vinstri grænna í Reykjavík

Greinin birtist fyrst á vef Fréttablaðsins

Einnig á visir.is